زجــل | بلا بيك..هاذ الدنيا آش تساوي... ؟
مشتاق وربيت..
من قديم اشواقي
وهيامي بيك..
يالمالكني من زمان..
كان ومازال وباقي
****
ياراحة الروح
وبلسم جراحي
هاذ الدنيا..بلا بيك
والسر اللي فيك
آش تساوي؟
****
هاذ العالم ..بلا بيك
بأرضو وسماه
فصيفو وشتاه
فدوامو وفناه
تافه..خالي
****
بلا بيك أنا طير
ذبالت جناحو
وماعاد يطير
ويقطع جبال عالية
ويهد سوارشامخة
فرحان بالنورالباهي
فعشو راكن مهموم
يغرد بحزان..
بدوام الزمان..
تائه فضباب الليل
شارد وساهي
****
أنا الدايب فحر الشوق
مالي حيلة وغلبني
من اهوالو نقاسي ونذوق
قاسي وصهدو حامي
****
أنا الحاير فبحربهاك
والبحربمواج يهيج
كيف السيل إلى سال
وطال ليلي زاد وطال
وننادي بلسان الحال
محال يطلع نهاري
****
ياوردة فجنان تفوح
بعطور الحب الصافي
يا نجمة فعلاها تلوح
بنوار ضياك
بهاها يعافي
****
فاللي بحالك ألحبيب
العين الراضية
ماشافت عيب..
ياللي طبعك مالو مثيل
كيف الدر الصافي
ضاوي قنديل
****
يالساكن فعماق عماقي
يامن دمويسري فعروقي
العيشة بلا بيك تحرار
سال وسول وشوف
حالي باين معروف
وليك ايام تجيب اخبار
****
صـــلاح اهــضــيــر
شكرا لك .. الى اللقاء
*
*
ليست هناك تعليقات:
ضع تعليقك اسفله إذا كان عندك استفسار..